Rasmiy diniy veb-saytlardagi mediakontentning mutaassiblikka qarshi kurashda tutgan o‘rni
Diniy yo‘nalishdagi veb-saytlarni mazmuni, texnik infratuzilmasi va interaktiv, muloqot funksiyalariga ko‘ra ikki turga ajratish mumkin: davlat yoki rasmiy diniy tashkilotlarga tegishli rasmiy institutsional veb-saytlar hamda fanlar nuqtayi nazaridan tahliliy video chiqishlar joylashtiriladigan ilmiy-ma’rifiy veb-saytlar. O‘zbekistonda muslim.uz, islom.uz, moturidiy.uz, iiau.uz kabilar ularga misol bo‘la oladi. O‘zbekistonda e’tiqod qiluvchilar soni jihatidan musulmonlar ko‘pchilikni tashkil qilganligi sababli ham, islom bilan bog‘liq veb-saytlar mos ravishda boshqa konfessiyalardan ko‘proqni tashkil qiladi. O‘zbekiston musulmonlar idorasining rasmiy muslim.uz portali, ayollar masalalarini o‘zida jamlagan muslimaat.uz hamda xalqaro ilmiy-tadqiqot markazining rasmiy sahifasi hisoblangan moturidiy.uz veb-saytlaridagi mediakontent mutaassiblikka qarshi kurashda muhim ahamiyat kasb etadi.
Muslim.uz mediakontentining son va sifati ortib borgani sayin, uning foydalanuvchilari ham yildan-yilga ortib bordi. Bu holat ayniqsa 2020-yillarda ko‘zga tashlandi. Statistik tahlilga ko‘ra, 2019-yil dekabr oyida sayt foydalanuvchilari o‘rtacha 4 mingdan ortiq bo‘lgan bo‘lsa, 2020-yil aprel oyiga kelib, kunlik o‘rtacha ko‘rsatkich 7,5 barobarga oshgan (29 956 foydalanuvchi, 1-ilova). Kontentlar ko‘rsatkichiga ta’sir ko‘rsatgan tashqi omil koronavirus pandemiyasining internetdagi jarayonlarga ta’siri bo‘lsa, ikkinchisi diniy-ma’rifiy soha vakillarining har taraflama malaka oshirganliklari bo‘ldi.
O‘zbekiston Respublikasi Prezidentining “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi farmonining ijrosini ta’minlash maqsadida O‘zbekiston xalqaro islom akademiyasi huzurida Malaka oshirish markazi va “Ziyo” media markazini tashkil etish hamda ularning faoliyatini qo‘llab-quvvatlash chora-tadbirlari to‘g‘risidagi Vazirlar mahkamasining 25-son qarori tasdiqlandi. Qarorga muvofiq O‘zbekiston xalqaro islomshunoslik akademiyasi huzurida Qoraqalpog‘iston Respublikasi, Samarqand, Namangan va Surxondaryo viloyatlari mintaqaviy filiallariga ega bo‘lgan muassasa shaklidagi Malaka oshirish markazi tashkil etildi. Qolaversa, “Ziyo” media markazi mamlakatimizda dinning asl insonparvarlik mohiyatini, ajdodlarimizning islom va jahon sivilizatsiyasiga boy diniy-ilmiy merosini keng targ‘ib qiluvchi, diniy-ma’rifiy hayotdagi yangiliklarni jamoatchilikka yetkazuvchi muassasa shaklidagi asosiy media tuzilma sifatida shakllantirildi. Unga ko‘ra, diniy soha xodimlari, shuningdek, mazkur sohada faoliyat yurituvchi davlat va nodavlat notijorat tashkilotlari xodimlari, oliy, o‘rta maxsus, umumiy o‘rta ta’lim muassasalarining pedagog kadrlari qayta tayyorgarlikdan o‘tadi va malaka oshiradi.
Abduraimova Shahzoda Abdulatip qizi
O‘zbekiston xalqaro islomshunoslik akademiyasi
“Dinshunoslik va jahon dinlarini qiyosiy o'rganish UNESKO” kafedrasi
tadqiqotchisi